ငါ့အသက်လည်းတစ်ရက်တစ်နေ့၊ တရွေ့ရွေ့ဖြင့်လင့်ခဲ့ဇရာ၊ ရော်ရင့်လာခဲ့ ။
ငါ့ဆံပင်လည်းငွေမျှင်သေးသေး၊ ဖြူဖြူဖွေး၍ငယ်သွေးမစို၊ ပျက်ယွင်းယိုခဲ့ ။
ငါ့မျက်လုံးလည်းဖုံးခဲ့မွှေးရှည်၊ မျက်ရည်ခြောက်ခန်းလွှမ်းခဲ့မျက်တောင်၊ မှေးမှေးမှောင်ခဲ့ ။
ငါ၏နားလည်းမကြားဆွံ့ထိုင်း၊ မုန်တိုင်းဆူညံအသံသဲ့သဲ့၊ ဝေးဝေးခဲ့၏ ။
ငါ့နှာခေါင်းလည်းပန်းပေါင်းနံ့သာ၊ သင်းသင်းဖြာကိုရှိုက်ပါရှူငြား၊ ခါးကြီးခါးခဲ့ ။
ငါ့နှုတ်ခမ်းလည်းစိမ့်စမ်းသီတာ၊ ချိုသကာလူးပန်းဖူးငုံဆင့် ၊ မလန်းပွင့်တော့ ။
ငါ့အသားလည်းပပ်ကြားအက်နေ၊ ပါးရေတွန့်တွန့်လှိုင်းလွန့်လွန့်ထ၊ အိုမင်းလှပြီ ။
ငါ့အသွေးလည်းခြင်ကျွေးသန်းကိုက်၊ သိုက်သိုက်ရုံးရုံး"စားမြိန်တုံး"သာ ဖြစ်ခဲ့ပါ၏ ။
ငါ၏ခြေလည်းမိုးအမြေအဆုံး၊ စက်ဝိုင်းကုံးရောက်မလျှောက်တော့နိုင်၊ နွမ်းနွမ်းယိုင်ခဲ့ ။
ငါ၏လက်လည်းမသွက်တော့ပြီ၊ ကြုံလှီဖျော့ညှိုးအရိုးပေါ်တွင်၊ အရေတင်ခဲ့ ။
ငါ၏စိတ်လည်းအတိတ်တွင်ကျန်၊ မုန်တိုင်းထန်ညလွန်ခဲ့ရသို့၊ မှိုင်းမှိုင်းညို့ခဲ့ ။
ငါ့အတွေးလည်းရှုပ်ထွေးနောက်ကျိ၊ အဆိပ်ထိပန်းပြန်မလန်းသို့ မည်းမည်းညို့တည်း ။
ငါ့ဦးနှောက်လည်းကျောက်ဆောင်အိုကြီး၊ အထီးတည်းသို့ငြီးငွေ့လောက၊ ရွံ့မုန်းခွေတည့်။
ငါ့အသည်းလည်းအက်ကွဲကြေမွ၊ အပိုင်းစနှင့်ရှေးကတုန်းလို၊ ရင်မဖိုတော့ ။
ငါ့ကလောင်လည်းမင်ကြောင်စပြု၊ ချေးညိုစု၍စာနုရေးတိုင်း၊ တုံ့နှေးဆိုင်းခဲ့ ။
ငါ့ဝိညာဉ်လည်းသိပ်သည်းကျဉ်းမြောင်း၊ သစ်ခေါင်းတိုးငှက်အသက်ရှူရပ်၊ ဆို့ဆို့ကျပ်ခဲ့ ။
ငါ့လိပ်ပြာလည်းစွန့်ခွာကိုယ်မှ၊ ထွက်ပြေးကြ၍ဘ၀လမ်းခွဲ၊ မျက်နှာလွှဲကြ ။
ငါ့မိခင်မှရွှေစင်သူ့သား၊ လက်ဖ၀ါးကိုကိုင်ထားယုယ၊ ခေါင်းငိုက်ချလျက် ။
ငါ့ဇနီးကားငါ့အားပွေ့ပိုက်၊ နမ်းရှိုက်နောက်ဆုံးငိုချုန်းပဲ့တင်၊ အလောင်းပြင်၏ ။
ငါ့သမီးမူမြင်းဖြူသစ်ရုပ်၊ ဆော့လှုပ်ကစားငါ့အနားတွင်၊ ပြုံးရွှင်ရွှင်တည့် ။
ငါ့မိတ်ဆွေများဝိုင်းရံထား၍၊ ငါ့အားစိုက်ကြည့်မျက်ရည်ပြည့်နှင့်၊ သောကဆင့်ကြ ။
သြော်.... ကဗျာ... ကဗျာရေးခဲ့ပါလည်း၊ ကြေးဝါတစ်ပြားသနားသူမျှ၊ မရှိကြတည့် ။
ငါကမယူ၊ "ဝေဖန်သူ"သာဖွေရှာတွေ့လို့၊ လက်ကမ်းကြိုခဲ့ညဆိုအိပ်ပျက်၊ လန့်လျက်ထနိုးတစ်မိုးလည်းသောက်၊ တစ်ညဥ့်ရောက်ပြန်ကြိမ်ဖန်ဖန်ပင်၊ သွားပြန်လမ်းဆုံဝိညာဉ်ဘုံက၊ သံစုံဟစ်အော်သေမင်းခေါ်သံ၊ စောင်းသံလေလားထွေပြားစိတ်မှာ၊ ငါ့လင်္ကာကိုဖတ်ပါသေမင်း၊ သူပင်ညှဉ်း၍ငိုချင်းနှင့်တေး၊ ကြိုက်ရာရွေးရနံနက်ထသော်၊ ရေးစလင်္ကာစာရွက်ပြာသည်လေမှာလွင့်လွင့်ဝဲ၀ဲတည်း ။
Internet မှ ရှာလို့ရတဲ့ ဆရာကြီး ဒေါင်းနွယ်ဆွေ ကဗျာလေးပါ။ Link ကိုတော့ မမှတ်မိတော့ပါ။
ကျွန်တော်သိပ်ကြိုက်တဲ့ “ကလျာမိမိမုန်း” ကဗျာကိုတော့ ရှာဆဲပါ။
